अस्ट्रेलियामा रहेको बुनेशा इन्टरनेशनलका धेरै ‘प्रोडक्ट’मध्ये नार्कोसी डट कम एउटा हो । यसका प्रमुख कार्यकारी अधिकृतका रूपमा नेतृत्व गरिरहनुभएका खेम शर्माको अस्ट्रेलिया बसाइ, सूचना प्रविधि उद्योगमा योगदान र उहाँले नेपालमा सुरु गर्नुभएको सरसफाइ अभियानबारे बिरलै नागरिकलाई जानकारी होला । नार्कोसी डट कमको स्लोगन नै छ ‘अ बिग न्युज गेट वे ।’ अर्थात् यो ठूलो समाचारको ढोका हो । हाल यो पोर्टलमार्फत नेपाली भाषाका सबै समाचार अनलाइनमा पुग्न सकिन्छ । सँगसँगै यो मिडिया र पाठकबीचको पुल पनि हो । यो गेटवेबाट पाठकले आफूले रुचाएका नेपाली भाषाका समाचार, विचार र विश्लेषण पढ्न, सुन्न अनि हेर्न सक्छन् । साथै मिडियाले आफूले चाहेको पाठक पनि यो गेटवे मार्फत पाउँछन् । यसको पछिल्लो सेवाको रूपमा नार्कोसी भिडियो हो । अहिले नार्कोसीमा युट्युबमा अपलोड भएको कुनै पनि नेपाली भाषाको भिडियो केही मिनेटमै हेर्न सकिन्छ ।